அந்நியதேசமும் எம்மவர் அவலவாழ்க்கையும்

அன்னை பூமியைவிட்டு 
அந்நியதேசம் வந்தோம்
ஆனந்த வாழ்க்கையென்று 
அவஸ்தையில் வாழ்கின்றோம் 

தவங்கள் செய்து 
சாபங்கள் பெற்றோம் 
யுகங்கள் தோறும் 
பாவங்கள் சுமக்கின்றோம் 

சொர்க்கம்விட்டு சொர்க்கம்தேடி 
நரகம் வந்தோம் 
தூக்கம்விற்று துக்கம்வாங்கி
ஏங்கி நிற்கின்றோம் 

ஆயிரம் கனவுகளோடு வந்த நாம் 
தூக்கத்தை இழந்தோம் 
ஆயிரம் ஆசைகளோடு வந்த நாம் 
பாஷையை மறந்தோம் 

யுத்தம் இங்கே இல்லை 
இரத்தம் இங்கே இல்லை -ஆனால்
நித்தம் நித்தம் செத்து பிழைக்கிறோம் 

ஓடியோடி அலைகிறோம்
ஓய்வென்பது இல்லை 
தேடித்தேடி தொலைகிறோம்
தேடல் முடியவும் இல்லை 

ஆயுதப்போரில் 
தப்பிக்கொண்ட நாம் 
வாழ்க்கைப்போரில் 
மாட்டிக்கொண்டோம் 

பணம்மீது மோகம்கொண்டு 
மனங்கள் இங்கே சாகிறது 
சுயநலங்கள் ஓங்கிக்கொள்ள
பொதுநலங்கள் பொசுங்குகிறது 

காலைவாரும் உலகத்திலே 
காலடி வைத்தோம் 
தோளைக்கொடுத்து தூக்கினால் 
தலைமேல் காலால் மிதிக்கிறார்கள் 

பண்பு பண்பாடெல்லாம் 
பாடையில் ஏறுகிறது 
மாண்பு மனிதமெல்லாம் 
மடிந்து போகிறது 

உள்ளக்கிடங்கில் உணர்வுகள் 
புதைந்து போகிறது 
உயிரில் கலந்த தாய்மொழியும் 
சிதைந்து போகிறது 

ஆசையெல்லாம் பூட்டி 
சாவியை தொலைத்துவிட்டோம் 
ஆடைபூண்ட ஆண்டியாய் 
அவணியில் வாழ்கின்றோம் 

சுற்றும் முற்றும் பார்த்தால் 
சுத்தம் எதுவும் இல்லை 
புத்தன் பெற்ற ஞானம் 
சித்தம் அடைகிறது 

சுற்றும் பூமியின் வேகத்தை 
விஞ்சுது எங்கள் வேகம் 
சுற்றம் கலந்து சிந்திக்க 
சற்றும் இல்லை நேரம் 

புத்தம் புதிதாய் 
மாறுது பூமி 
சித்தம் கலங்கிய பித்தனாய் 
ஆகிறான் மனிதன் 

ஓய்யாரவாழ்க்கை வாழ்ந்தவரெல்லாம் 
ஒற்றை அறைக்குள்ளே 
ஒருவரையொருவர் பார்க்காமல் 
குடும்பம் நடத்தினம் 

அவலம் எங்கள் வாழ்வை 
குத்தகைக்கு எடுத்துக்கொண்டது 
ஆயுள் முழுவதும் தொடர்வதாக 
ஒப்பந்தமும் போட்டது 

அகதியாய் நாம் வாழவேண்டுமென்பது 
உலக நியதியானது 
அணுஅணுவாய் சாகவேண்டுமென்பது 
ஆண்டவன் நீதியானது 

தாய்த் திருநாடே உன் மடியில் 
மடியும் காலமாவது வந்திடுமா ?

 

வெற்றியின் இரகசியம்

ஓரிரு முறை முயற்சி செய்து விட்டு,'இதற்கு மேல் என்னால் முடியாது.'என்று சொல்பவன் சராசரியானவன். 'என் இலட்சியத்தை எட்டும் வரை,முயற்சி செய்து கொண்டேயிருப்பேன்'என்று சொல்பவன் சாதனையாளன்.தோல்வியால் துவண்டவர்களை இந்த உலகம் நினைவில் வைத்திருப்பதில்லை.தோல்வி உங்களுக்கு புதிய உற்சாகத்தையும்,வைராக்கியமும் கொடுக்க வேண்டுமே தவிர,விரக்தியை கொடுக்கக் கூடாது.யாருக்கும் முதல் முயற்சியிலேயே மிகப்பெரிய வெற்றி கிடைத்து விடுவதில்லை.

தடைக்கற்களை முன்னேற்றத்துக்கான் படிக்கற்கள் என்று நினைத்துக் கொள்வோம். "வீழ்ந்தோம்" என்று இந்த உலகம் நம்மைப் பற்றிச் சொல்லும் போது,அதே உலகம் "வென்றோம்" என்று சொல்லும்படி சாதித்துக் காட்டுவோம்.தோல்வி என்றும் நிரந்தரமானதல்ல.நம்முடைய முயற்சிகளில் சில தோல்வியைத் தழுவலாம்.ஆனால் முயற்சியே எடுக்காமல் விட்டு விட்டால், நம்முடைய வாழ்க்கையே தோல்வியில் முடியும்.உடனுக்குடன் பலனை எதிர்பார்ப்பது உடனே பலன் கிடைக்காவிட்டால்,சோர்ந்து விடுவது சிறுபிள்ளைத்தனம்..பிரச்சினைகளைக் கண்டு ஓடி ஒழிவது கோழைத்தனம்.ஓடி ஒழிவதால் பிரச்சனைகுத் தீர்வு கிட்டுவதில்லை.பிரச்சினையின் தன்மைக்கேற்ப,தீர்வு உடனே கிடைக்கலாம் அல்லது சில காலம் கழித்துக்கிடைக்கலாம்.

“மூச்சு விடுபவன் மனிதன் அல்ல, முயற்சி செய்பவனே மனிதன்”

கிரேக்க தத்துவ ஞானி சாக்ரடீஸ்,

”ஒரே வேலைய திரும்பத் திரும்ப ஒரே மாதிரி செய்துவிட்டு வித்தியாசமான பலனை எதிர்பார்ப்பதற்குப் பெயர் தான் முட்டாள்தனம்.”

அல்பிரட் ஐன்ஸ்டீனிடம் முட்டாள்தனத்திக்கு விளக்கம் கேட்டபோது

இந்த உலகில் முயற்சி இன்றி வெற்றி பெற்றவர்களை அறிந்து இருக்கவே முடியாது..நமக்கு தோல்வியோ பின்னடைவோ வரும் போது,நம்மை நாமே கேட்டுக்கொள்ள வேண்டிய கேள்விகள்...’தோல்வி அல்லது பின்னடைவுக்கு என்ன காரணம்? எங்கே தவறு நடந்தது? நான் இதிலிருந்து கற்றுக் கொண்ட பாடம் என்ன? இனிமேல் இந்த மாதிரி தவறு நிகழாமல் இருக்க என்ன செய்ய வேண்டும்? என்பவையே எனவே இவற்றை நினைத்துப் பாருங்கள்..உங்கள் தோள்களின் சுமை எளிதாகும்..