முயலாய் முயன்றோம்

ஆளே கிடைக்காமல் 
ஆமையை அழைத்தது போட்டிக்கு
அறவே மறுத்தாலும் 
அடம்பிடித்து இழுத்தது முயல் 

ஆயத்தமானது 
ஆமையும் போட்டிக்கு 
ஆரம்பமானது 
அன்றைய போட்டி

முண்டியடித்துக்கொண்டு
முயல் பாய்ந்தோடியது

அரக்கி அரக்கியே
ஆமை நகர்ந்தது

ஆமை வெல்வது
அசாத்தியமானது - ஆனால்
அதுதான் சாத்தியமானது

முயல் தோற்றது
ஏற்றுக்கொள்ள முடியாது - ஆனால்
அதுதான் நிஜம்

போட்டி என்றோ முடிந்தாலும்
பேட்டி இன்றும் தொடர்கிறது

கேள்விகள்
வேள்விகளாய் எரிகின்றன

எப்படி
ஆமைக்கு சாத்தியமானது
எப்படி
முயலுக்கு அசாத்தியமானது

ஆமைக்கு
அசுர வேகம் கிடைத்ததா ?
அல்லது - முயலின்
அசமந்தபோக்கு
அசந்து தூங்க வைத்ததா ?

முயலாய் முயன்று
முண்டியடித்துக்கொண்டோடி
ஆமையிடம் தோற்று
அடங்கிக்கிடக்கிறோம் நாமும்
விடைதெரியாத வினாக்களுடன் ............

கற்பிழந்த கண்ணகியின் கண்ணீர் வாக்குமூலம்

பாரதி சொன்ன 
புதுமைப் பெண்ணாக 
புத்வேகத்துடன் 
புறப்பட்டு வந்தவள் நான்தான்

கலிகாலத்தில் - ஒரு 
கண்ணகியாக வாழ 

கங்கணம் கட்டிக்கொண்டு 
கம்பீரமாய் நின்றவள் நான்தான்

சீதையாய்
சிறைபிடிக்கப்பட்டேன் - ஆனால்
சீதையாய்
சிறை யெடுக்கப்படவில்லை

சிறைப்பட்டும்
சிதைபடாத சீதையல்ல நான்
சிறைக்குள்ளே
சிதைபட்ட பேதை நான்

வெளியுலகிற்கு
வெளிச்சம் போட்டு
வெட்கி போகாமல்
வெள்ளேந்தியாயிருந்தேன்

கண்ணகிகள்
கற்பிழக்கும்
கட்டாயக் காலம்
கட்டவிழ்த்து விடப்பட்டது

சீதைகள்
சீரழிய வேண்டிய
சிக்கலுக்குள்
சிக்கிக்கொண்டார்கள்

வலிகள் நிறைந்த
வலுவான வாழ்க்கைக்குள்
வலிந்து தள்ளும்
வழிகள் வகுக்கப்பட்டன

வழிகள் இல்லாததால்
வலுவும் இல்லாத நான்
வலிந்து தள்ளப்பட்டேன்
வசப்படுத்தும் வக்கிரத்திற்குள்

சூழ்நிலைகள்
சூழ்ந்துகொண்டு சூறையாடும்
சூழ்ச்சிகள் சூடுபிடித்ததால்
சூல் வர்த்தகம் -என்
சூட்சமமானது

எண் சாண் உடம்புக்கு
ஒரு சாண் தலை பிரதானம் -எம்
ஒரு சாண் வயிற்றுக்கு
எண் சாண்உடம்பே பிரதானமானது

நாயங்கள்
படுத்து கொண்டதால்
நானும்
படுத்து கொண்டேன்

எங்கள்
வயிற்று பசிக்கு
விருந்திடுவதற்கு
நான் பலருக்கு விருந்தானேன்

எங்களை தாங்க
யாருமில்லை என்பதால்
நான் பலரை தாங்கும் நிலை

எங்களுக்கு துணை
யாருமில்லை என்பதால்
நான்தனியாக தூங்குவதில்லை

இராமனின்
அக்கினி பிரவேச ஆணை
அர்த்தமுள்ளதாகும்
இனி வரும் காலமெல்லாம்

கவலை தீர்க்க
கண்ணீர் இல்லை என்னிடம்
கருணை இல்லை கடவுளிடமும்

அழுது அழுது
அழகை குறைக்க முடியாது
அடுத்த வேலை அழைப்பதால்
அவசரமாய் போய்வருகிறேன்

அச்சம்

பெண்களின் பலம் 
ஆண்மீது கொள்ளும் அச்சம் 
ஆண்களின் பலவீனம் 
பெண்மீது கொள்ளும் அச்சம் 

பெண்களின் 
ஆயுதம் அச்சம் 
ஆண்களின் 
ஆயுதம் அதிகாரம் 

இதுவே 
கலாச்சாரத்தில் கண்ணியமாகவும் 
காப்பியங்களில் அங்கமாகவும் 
காலந்தோறும் போற்றப்பட்டது 

இன்றைய காலத்தில் 
அச்சமெனும் ஆயுதத்தை 
தூக்கிஎறிந்துவிட்டு 
அதிகாரமெனும் ஆயுதத்தை ஏ 
ந்திக்கொண்டது பெண்னினம் 

அதிகாரம் என்ற ஆயுதத்தை 
இழந்ததினால் அச்சத்திற்குள் 
அடங்கிக்கொண்டது ஆண்ணினம் 

தன் தாய் தந்தைக்கு 
உணவளிக்க அச்சம் 
தன் தம்பி தங்கைக்கு 
உதவி செய்ய அச்சம் - இது 
ஆணினத்திற்கு மட்டுமல்ல 
பெண்னினத்திற்கும் வெட்கம் 

தான் உழைத்தாலும் 
தன் தேவைக்கே 
தன் மனைவியிடம் 
கெஞ்சும் துர்ப்பாக்கிய நிலை சிலஆண்களுக்கு 

மனைவிசொல் மந்திரமானது 
எல்லாம் சக்திமயம் ஆனதால் 
சிவமயமும் பயமயமாகியது 

இலச்சம் இருந்தாலும் 
இலச்சணம் இருந்தாலும் 
அச்சம் இல்லையெனில் அவள் பெண்ணில்லை 

அழகு இருந்தாலும் 
அறிவு இருந்தாலும் 
அடுப்பெரிக்க தெரியாதவள் பெண்ணில்லை 

அச்சமுள்ள பெண் 
உச்சத்தில் வைக்கப்படுவாள் 
அச்சமிலா பெண் 
எச்சத்திற்கு சமம் 

பெண்மையின் மென்மையும் 
பெண்மையின் மேன்மையும் 
அச்சத்தின் தன்மையிலே 
தங்கியிருக்கிறது 

கலாச்சாரத்தின் அச்சாணியே 
பெண்மையின் அச்சம்தான் 

பெண்மை அச்சத்தை இழக்கும்போது 
கலாச்சாரம் முட்டிமோதி உடைந்து போகிறது 

வீரத்தாயிடம் ஒரு வேண்டுதல்

மண்டாடிகேட்கிறேன்
கொண்டாட முடியாத வெற்றியும் 
திண்டாடுகின்ற தோல்வியும் 
வேண்டவே வேண்டாம் 

ஏமாற்றம் நிறைந்த மாற்றங்களும் 
ஏற்றங்கள் காணும் குற்றங்களும் 
சுற்றம் சூழும் பதற்றங்களும் 
அற்றே போகட்டும்

இயன்றவரை இயலாமை
இறந்தே போகட்டும்
இயலும் என்பது
இவ்வுலகை இயக்கி ஆளட்டும் 

ஏழையின் வானத்தில் .!!!!!!

ஒழுகுகின்ற ஓலைக் குடிசைக்குள் 
ஒழுகாத இடம் தேடி 
தோற்றுப் போகும் ஓர் ஏழை 

இவன் ......
தண்ணீரால் தாகத்தை மட்டுமல்ல 
பசியையும் போக்கத் தெரிந்தவன் 

இவன் வானத்தில் 
சூரியன் உதித்த காலங்கள் குறைவு 
பெரும்பாலான நாட்கள் 
இருளாகவே கழிந்துவிட்டது 

இடையிடையே கவலை மேகங்கள் 
கண்ணீர் மழை பொழிந்தது 
தோல்வியின் ரணங்கள் 
இடி மின்னலாய் முழங்கியது 

வறுமையின் வலிகள் 
சிவப்பு வானவில்லை தோன்றியது 
பசியால் கொட்டாவி 
புயல் காற்றை வீசியது 

அதிஷ்டங்கள் 
கார்த்திகைபிறையாய் காட்சியளித்தது 
கனவுகள் 
நிலவாய் உலா வந்தது 

எதிர்பார்ப்புகள் 
நட்சத்திரங்களாய் ஜொலித்தது 
ஆறுதல் வார்த்தைகள் 
விடிவெள்ளியாய் ஒளிர்ந்தது 

மொத்தத்தில் இவன் வானத்தில் 
நிஜங்கள் இருளாகவும் 
நினைவுகள் வெளிச்சமாகவும் !!!

நீயாகிய நான் ...

உன்னை நான்

இனி காயப்படுத்தப்போவதில்லை

உன்னைக் காயப்படுத்திவிட்டு

வீடு திரும்பிய போது உன்னைவிட  அதிகம்

காயப்பட்டுக்கிடந்தவன் நான்தான்

குழப்பத்தில் சிதறிப்போய்விட்டேன்

உன்னை அடித்ததில்

எனக்கு தழும்புகள் வந்ததால்

பிறகு புரிந்து கொண்டேன் -நான்

காயப்படுத்திக்கொண்டது உன்னை

தண்டித்துக்கொண்டது என்னை

ஏனென்றால் உண்மையில்

நீ என்பது நான்தான்

நியூட்டனின் விதிக்குள்

ஒரு ஆன்மிகம் இழையோடியதை

உன்னால் படித்துக்கொண்டேன்

நான் உனக்கு  செய்தது எல்லாம்

எனக்கே வந்துசேர்ந்தது

நான் எனக்கே செய்தது ஆனது

ஏனென்றால் உண்மையில்

நீ என்பது நான்தான்

அதைப் போலத்தான்

நான் என்பதும் நீதான்

என் மீது கற்கள் வீசினால்

உன் மீதும் கற்கள் வீசப்படும்

என் மீது பூக்கள்  தூவினால்        

உன் மீதும் பூக்கள் தூவப்படும்

என்னை நீ ஆசிர்வதித்தால்

நீயும் ஆசிர்வதிக்கப்படுவாய்

நீ எதைக் கொடுக்கிறாயோ

அது உன்னிடம் இருக்கும்

எவ்வளவு கொடுக்கிறாயோ

அவ்வளவு உன்னிடம் இருக்கும்

அன்பைக் குறைவாக வழங்கினால்

உன்னிடம் குறைவாக இருக்கும்

நிறைவாக வழங்கினால்

உன்னிடம் நிறைய இருக்கும்

கொடுக்கக் கொடுக்க

உன்னிடம் கூடிக்கொண்டேபோகும்

நான் சேமித்ததை எல்லாம்

நான் இழந்துவிட்டேன்

நான் கொடுத்தது எல்லாம்

எனதே ஆகிவிட்டது

எதையும் சேமித்து விடாதே

கொடுத்து விடு

உன்னிடம் இருப்பதை

என்னிடம் கொடுத்துவிடு -அது

உன்னிடம் தான் இருக்கும்

ஏனென்றால் உண்மையில்

நான் என்பதும் நீதான்

ஓஷோவின் 'புரட்சி விதை'

அமைதியான அந்த

இரவு நேரத்திலே

யாரோ புல்லங்குழல்

வாசித்துக்கொண்டு இருந்தார்கள்

நிலவொளி பிரகாசித்துக்கொண்டிருந்தது

ஏகாந்தமிக்க குளிர் நிறைந்த இரவு

எங்கிருந்தோ காற்றிலே

மிதந்து வரும் புல்லாங்குழலின் ஓசை

இனிய சொப்பனமாகத் தோன்றியது

நினைத்தும் பார்க்க முடியாத அளவிற்கு

அது மிகவும் அழகாக இருந்தது

ஒரு மூங்கிலின் வெற்றுக் குழலில்

எத்தகையதோர் அமிர்தமான இசை

வாழ்க்கையும்

ஒரு புல்லாங்குழல் போலத்தான்

தன்னிலே அது வெறுமையாக

சூன்யமாக உள்ளது அதனால் கூடவே

ஒரு மாபெரும் சங்கீதத்தையும்

பிரதிபலிக்கும் தகுதியையும் பெற்றுள்ளது

எல்லாம் அதை

மீட்டுபவர்களை பொறுத்து உள்ளது

எவ்வாறு ஒருவன்

அதை மீடடுகிறானோ வாழ்க்கையும்

அவ்வாறே மாறிவிடுகிறது

அதனை நிர்மாணிப்பது அவனே!

சொர்க்கத்தையோ நரகத்தையோ

அமைத்துக்கொள்ள அவன்

முழு சுதந்திரம் பெற்றிருக்கிறான்

அந்நியதேசமும் எம்மவர் அவலவாழ்க்கையும்

அன்னை பூமியைவிட்டு 
அந்நியதேசம் வந்தோம்
ஆனந்த வாழ்க்கையென்று 
அவஸ்தையில் வாழ்கின்றோம் 

தவங்கள் செய்து 
சாபங்கள் பெற்றோம் 
யுகங்கள் தோறும் 
பாவங்கள் சுமக்கின்றோம் 

சொர்க்கம்விட்டு சொர்க்கம்தேடி 
நரகம் வந்தோம் 
தூக்கம்விற்று துக்கம்வாங்கி
ஏங்கி நிற்கின்றோம் 

ஆயிரம் கனவுகளோடு வந்த நாம் 
தூக்கத்தை இழந்தோம் 
ஆயிரம் ஆசைகளோடு வந்த நாம் 
பாஷையை மறந்தோம் 

யுத்தம் இங்கே இல்லை 
இரத்தம் இங்கே இல்லை -ஆனால்
நித்தம் நித்தம் செத்து பிழைக்கிறோம் 

ஓடியோடி அலைகிறோம்
ஓய்வென்பது இல்லை 
தேடித்தேடி தொலைகிறோம்
தேடல் முடியவும் இல்லை 

ஆயுதப்போரில் 
தப்பிக்கொண்ட நாம் 
வாழ்க்கைப்போரில் 
மாட்டிக்கொண்டோம் 

பணம்மீது மோகம்கொண்டு 
மனங்கள் இங்கே சாகிறது 
சுயநலங்கள் ஓங்கிக்கொள்ள
பொதுநலங்கள் பொசுங்குகிறது 

காலைவாரும் உலகத்திலே 
காலடி வைத்தோம் 
தோளைக்கொடுத்து தூக்கினால் 
தலைமேல் காலால் மிதிக்கிறார்கள் 

பண்பு பண்பாடெல்லாம் 
பாடையில் ஏறுகிறது 
மாண்பு மனிதமெல்லாம் 
மடிந்து போகிறது 

உள்ளக்கிடங்கில் உணர்வுகள் 
புதைந்து போகிறது 
உயிரில் கலந்த தாய்மொழியும் 
சிதைந்து போகிறது 

ஆசையெல்லாம் பூட்டி 
சாவியை தொலைத்துவிட்டோம் 
ஆடைபூண்ட ஆண்டியாய் 
அவணியில் வாழ்கின்றோம் 

சுற்றும் முற்றும் பார்த்தால் 
சுத்தம் எதுவும் இல்லை 
புத்தன் பெற்ற ஞானம் 
சித்தம் அடைகிறது 

சுற்றும் பூமியின் வேகத்தை 
விஞ்சுது எங்கள் வேகம் 
சுற்றம் கலந்து சிந்திக்க 
சற்றும் இல்லை நேரம் 

புத்தம் புதிதாய் 
மாறுது பூமி 
சித்தம் கலங்கிய பித்தனாய் 
ஆகிறான் மனிதன் 

ஓய்யாரவாழ்க்கை வாழ்ந்தவரெல்லாம் 
ஒற்றை அறைக்குள்ளே 
ஒருவரையொருவர் பார்க்காமல் 
குடும்பம் நடத்தினம் 

அவலம் எங்கள் வாழ்வை 
குத்தகைக்கு எடுத்துக்கொண்டது 
ஆயுள் முழுவதும் தொடர்வதாக 
ஒப்பந்தமும் போட்டது 

அகதியாய் நாம் வாழவேண்டுமென்பது 
உலக நியதியானது 
அணுஅணுவாய் சாகவேண்டுமென்பது 
ஆண்டவன் நீதியானது 

தாய்த் திருநாடே உன் மடியில் 
மடியும் காலமாவது வந்திடுமா ?